اليوم بما أني مداومة حالي حال الي قاعدين يتعذبون مثلي .. قعدة الصبح قاتلة ودي أبجي :( كل يوم أقول حق نفسي ميخالف ( أناناسة ) هانت ما بقى شي على السفرة :) والنحشة من الحر والغبار والقعدة من صباح الله خير وركض حق البصمة وخرعة ما تسوى علي ....
برنامجي اليومي أقعد أول وحدة بالبيت @@ ..وباجي أعضاء أسرتي الكريمة بسابع نومة :) الله يهنيهم .... وأركب سيارتي وأكتشف اكتشاف خطير إني أول وحدة بالفريج ويمكن أنا الوحيدة إلي أطلع وأروح الدوام :( وطول الطريج يوسوسلي الشيطان ( حلوة يوسولي .. من الوسوسة ) أني أصفط على حارة الأمان وأطقها نومة .. بس همن أتعوذ من الشيطان الي ما وراه الا الخراب وأكمل طريجي للدوام ...
أبصم وأفتتح مكتبي المصون ( إحنا 3 بنات بعيون الشيطان بالمكتب ) وأول شي أسويه أقرا الجرايد .. وأتريق ريوقي العجيب الي كل من يشوفني يطننز علي ... تتوقعون شنو ؟!! حليب وكورنفلكس ... لوووووول.. والله أحبه وايد :) علي بالعافية والخطوة الأخيرة أجابل الإنترنت إلا نهاية الدوام .. من مدونتي الفاضلة والمدونات الصديقة والغير صديقة .. والفيس بوك ( أهم شي إني أكثر واحدة أكون شابكة بالفيس بوك @@) واليوتيوب ..طبعا هذا عالم آخر :).. غير أقرا تحليلات سياسية وأخبار ومقالات فكرية .....وبعدين يرن الجرس ( ترن ترن ترن ) خلص الدوام .. الحمدلله ..أبصم وأروح البيت بيت السعادة والهناء
وبالطريج لازم أسمع اخبال وفصلات الياقوت والأنصاري في برنامجهم الديوانية على المرينا اف ام :))) وطول الطريج أحاول أقمت ضحكتي عشان الناس لا يقولون ..شفيها مينونة تضحق بروحها .. كاااااك .. بس الصراحة موطبيعيين والي يتصلون أخس منهم :))بس برنامجهم حلو ومميز ...
يعني نتونس اشوي بالزحمة الي ترفع الضغط والناس الي تتمشه بالزحمة وما تعرف تسوق السيارة ... ولا البنات أووووف أكره سياقتهم العليمية .. طبعا موكلهم بعضهم لأن أنا من البنات الي أعرف أسوق الحمدلله :) ( لازم أمدح نفسي ;D
ليش الوحدة لما تسوق السيارة ما تحترم نفسها شوي ... تمشي على 80 بحارة اليسار ( حق الي يمشون 120 ) وتتكلم بالتلفون ولا همها الي وراها مستعيليين شنو راح يصير لما تمشي بأقصى اليمين وتمشي مشية الحمسة .. صج قلة أدب ... ولا وحدة بتسوي روحها خبيرة سياقة وتبتون ةلأنها عليمية فا لازم تشيل معاها جم سيارة :) لوووول
والي يقطون روحهم علي لا اشارة ولا بطيخ ما أدري مسكين الي مخترع الإشارة تعب وهو يفكر بطريقة حق الأوادم بس طلع الي يسوقون السياره كلش مو أوادم ... لووول والله مو مني من القهر الي فيني :(
قيادة السيارة أخلاق .. أخلاق .. أخلاق هذا اذا كان في قاموسهم كلمة أخلاق ... ويقولون ليش يصيرفينا ضغط من الي نشوفه ...
عجايب وغرايب .. الله يعينا :)
يبيله سباحة بهذا البحر اللي يشوق ................ :)))))))))))
أبي أسبح أبي أسبح:((((
فاصل كاريكاتور
__________________________________
هناك تعليقان (2):
شهاليوم الحلو
هونيها و تهون حبيبتي
تقبلي مروري الأول
يعطيج العافية
حلت دنياج :)
حياج ببيتج أقصد بمدونتج الثانية .. الي هي مدونتي :))
وأتشرف :)
إرسال تعليق