الأحد، 28 يونيو 2009

ليش؟!!! وحق شنو ؟!!! وشنو الفايدة ؟؟!!!!




هذا المواقع وغيرها وايد ... صايرة ما أعيش بدونهم إذا مر يوم ما أدخلهم وأشوف شنو اليديد الي صار ..يصير يومي معفوس ...ومافيه أي طعم ... ولما أتذكر متى صار وضعي جذي ما أتنذكر ؟؟؟ قمت أخاف من تأثيرهم القوي بحياتنا .. صارت جزء من حياتنا وكأنها واحد من أفراد الأسرة :)



كنت أتابع حال الإيرانيين خاصة بعد انتخابات 2009 وما تابعها من غضب الإصلاحيين والمعارضة الإيرانية ( معارضة نظام نجاد وسلطة الولي الفقيه ) ... اشلون انفجر الشعب وخاصة الشباب الي كانو المحرك الأساسي للمظاهرات :).. واشلون استغل الشباب عالم الإنترنت ( مدونات وتويتر وفيس بوك ويوتيوب ..) لنشر مايحدث خاصة من قوات الباسيج والأمن الإيراني رغم قوة منع ورقابة الحكومة الايرانية للانترنت إلى أنهم اخترقوا حواجز المنع في سبيل قضيتهم ... والمحرك الأساسي هو قوة ايمانهم بالاصلاح وأن التغير قادم لا محالة ...

وأدري راح تقولون أكيد فيني عرج ايراني ( عيمية ) ولا احنا شكو بالي يصير في ايران ..وايد من كتاب المقالات يقولون قلعتهم أو مثل مايقول المثل ( خبز خبزتيه يا ...كملو !!) .... لأن ايران كانت تخطط للانقلابات داخل سورية ولبنان والعراق فيا دورها تاخذ نصيبها من الي خططته !!

بس اذا شفنا القضية بكل موضوعية وعقل راح نشوف ان تاثيرها راح يوصلنا ..اشلون ؟؟؟أنا أقولكم :)

اذا فرضنا ان صارانقلاب أو حرب أهلية ( الله يحفظنا ان شاء الله من كل سوء ) أكيد في لاجئين خاصة الناس الي مالهمش بالسياسة وعوار الراس وهمهم يدورون لقمة العيش وسلامة عيالهم فوين راح يروحون !!




الخيار الأول العراق و باكستان وأفغانستان طبعا لا شنو مينن ولا موصاحيين يطلعون من أرض حرب حق ارض فيها حرب اخس وألعن .....طيب شنو الخيار الثاني ؟؟؟ السعودية هاهاها راح تصير نكتة الموسم ليش لأن السعودية ما تبي شيعة على أراضيها اهيه متوهقة بأهل الاحساء .... طيب شنو الخيار الثالث الإمارات ... قوية لأن الإمارات وايران مثل الدياجة ما يبلعون بعض وخاصة في مشكلة الجزر إلي لالحين ما انحلت :(
طبعا الخيار الرابع وهو الأفضل الدولة المسكينة الطيبة الي دايما تحافظ على أمن الدول الثانية وتنسى نفسها .... الكويت و خاصة ان الكويت يسكن على ارضها نص الايرانيين ..
لكن تظل هذه نظرة تشائمية جدا وان شاء الله ما تصير على أرض الواقع ........
خلونا ننتقل للنظرة المشرقة والمتفائلة بالقضية والي ان شاء الله تصير صج :))
أن أحمد نجاد وشلته مجلس الثورة شوي يستحون على ويهم ويتنازلون عن كرسي الحكم حق الاصلاحيين المعارضة عشان تصير ايران دولة لها كيانها ويحترمها العالم ويعيش الايرانيين بحرية مو يروحون دول العالم ويفسخون الحيا مروة وحدة من القهر ومن كثر ما مصكرين عليهم :)
في النهاية هم بشر ولهم حقوقهم وأهم حق ان نهم يعيشون كانسان .... مو دمة بايد مجلس الثورة :)
الله يستر ويحفظنا يحفظه :))*




الرساله الي حبيت اوجهها حق مستخدمين هذه المواقع انها تكون سبيل للتنمية والفائدة لديننا الإسلام وديرتنا الحبيبة الكويت ... موحق الخرابيط الي مالها معنا ... ومادام عندنا حرية والحمدلله خل نستغل هذه الحرية بما يرضي الله سبحانه ....
الله يعينا على التكنلوجيا D;


____________________________________

هناك 10 تعليقات:

Q8 TeaCHeR يقول...

اناناسه حبيت بلوقج صراحه وشوقيتني :))

Nikon 8 يقول...

لحد الحين ما أدمنت الفيس بوك :(
كافي علي البلوغ :))
واليوتيب أحيانا :)

ananasah يقول...

Q8 TeaCHeR
حياج الله وتشرفت بزيارتج وتعليقج :)
وحبتج العافية :)))

Blog 3amty يقول...

عولمة ..

ananasah يقول...

Nikon 8
نورت مدونتي بزيارتج D;
والفيس بوك وايد حبيته لأني شبكت مع ريفيجاتي إلي ما أدري عنهم من يوم الجامعة :))

ananasah يقول...

Blog 3amty
عولمة .. أمركة .... إلي تبيه :)))
لوووول

جنون الكويت يقول...

والله تحليلج مميز تصلحين محلله سياسيه..........^_^شكرا على البوست الجميل

The.One يقول...

خليهــأ تكون جزء من حياتــج
وزيــن تسويــن
دام قام تستخدمينهــم بهذا الاتجـاه
بهـدف حلو مثل هذا





وكافـي أحنـا بعصر التكنلوجيـا
ولازم نستخدم أمور أسرع في تلقـي الاخبار :)



Nice blog يامحللتـنا السياسيـه

ananasah يقول...

جنونالكويت :
حياج الله بمدونتي :)
بما أني كويتية فآنا محلله سياسية بالفطرة :)
لوووووول

ananasah يقول...

The.One :
أتشرف بزيارتج لمدونتي المتواضعة ;P
بس ما تعتقدين أن التكنلوجيا خلتنا نتعامل مع بعضنا البعض (المعاملة بين الناس ) وايد جامدة بدون أي مشاعر ..صرنا شطار بالتعامل مع الأجهزة ..وافتقدنا مهارات التعامل مع البشر :))